ألاعيب
بقلمي هلال البنا
-_-...-_-...-_-...-_-
لما نشوف العيب ونسكت
بالألاعيب
والعيب لما العدل يغيب
والحق فينا يبقى غريب
بالألاعيب
ولما نشوف الغلب بيكبر
بالألاعيب
العيب لما الدنيا بتمشى بالمقلوب
ولما الغالب يطلب حقه
من المغلوب
والمظلوم يسكت ميقول
ده حرام عيب
ولما نشوف الراجل بيبكى
بشكل رهيب
ولما نشوف الطفل بيلبس
توب الشيب
ولما بتشكي بمر. القول
ويقولك قول
المرسوم لو بالعرض
أو بالطول
ولما نار الكدب بتكبر
تبقى لهيب
ولما نكون شايفين الشر
عمال بيزيد
ولما يكون للشر أيادي
في كل مكان أصوات بتنادي
في النحيادي والنحيادي
بالألاعيب
ولما نشوف بلاد حوالينا
وظلم الدنيا عامي عنينا
خرس لسانا وشل ايدينا
ولآ بقلوبنا حتى دعينا
بالألاعيب
جبال وسهول وهضاب وبوادي
وناس في ساحات وناس في نوادي
عددنا رهيب
والإنسان عطشان و جعان
ولآ لاقيين أكل الحيوان
وعنده النيل بالخير مليان
ميه بتجري حلوه زلال
أنهار نازله على لجبال
بالخير لينا وللسودان
وازاي واحد يبقى جعان
ولا فقير أو عطشان
بالألاعيب
وبالأكاذيب
شكله مريب رطاط فاضي
مش لعيب وعاملي رياضي
كله عيوب لكن مش راضي
شيخ ومهيب ولآ ينفع قاضي
في الألاعيب وبالصفاره
يحكم عدل وكارت أماره
ولا يظلم واللعب حضاره
والكل بيسقف بحراره
لو جمهور زعلان مش راضي
يبقى التاني مبسوط م القاضي
بالألاعيب
لما العدل ينام ويغيب
و التهليب بيضر و كئيب
لما نشوف العيب ونسكت
ليه انخلي المحتاج يطلب
نسمع صوته بيبكي ونصمت
وترضى الدم من وشك يهرب
والتهريب شغال في الجيب
م الفقرا ولجيوب محاسيب
بالألاعيب
لما العاجز روحه بتطلع
ولآ فيش حد لبكاه بيسمع
دخله قليل ومطلوب يدفع
يرهن نفسه وياريت ينفع
لما الجار مايحس بجاره
ميرحلوش يتكلم يشفع
وشايف الجوع و الذل وناره
فرحان وشمتان في مراره
ومين يقولي إيه أعذاره
بعد ده كله ولسه بيطمع
بالألاعيب
ولما تنادي على الأحباب
يبقى الرد إنك كداب
ولاتدخلش في أيي عتاب
من غير أيي دليل في كتاب
ولا بالخوف من يوم لحساب
زي ما يكونوا ٱلهه أخشاب
أو من عجوه ومالوش دعوه
سبحانه رب الأرباب
بالألاعيب
ولما نشوف العيب بعنينا
غلبان متبهدل. حوالينا
ولا بلسانا ولا ب إيدينا
ولا بقلوبنا مره نوينا
والحيوان يمكن بيغار
والأحجار بتحن علينا
مين يرحم لو حتى بنحلم
يرحمنا. ويرحم أهالينا
بالألاعيب
ولما نشوف الغلط ونسكت
نبقى وقت الصمت بنغلط
شيطان أخرس وجبان مفلس
لما نسيب الغلطان يفرط
إنسان محبط وكلام منحس
والأنفاس والهوى راح يحبس
يبقى الساكت نيله وأوكس
لما يشوف العيب ويسكت
والألاعيب
،،،،،،،،،،،،،،،،،،،،،،
ألاعيب
بقلمي هلال البنا
ليست هناك تعليقات:
إرسال تعليق