/ رح إنطرك ياعيد /
باقي متل ما كنت عَ الدرب الصحيح
بقول الحقيقه وهيك رح إبقى صريح
رح إنطرك ياعيد عَ دراج السني
وفيّق صباح الخير عَ فراشو المريح
وقطّف أماني مع عبير السوسني
وعبّي عطور الحب بالقلب السميح
ورح ضل متل الشام مش رح إنحني
ومن هالأرض رغم الحرب . . مابزيح
تتعود سوريّا عروس . . مزيّني
وترجع وسام الشرق والكون الفسيح
ولو يصلبوني ويجرحوا الحلم الهني
ويبقى الجرح مفتوح بالقلب الجريح
ببقى أنا بحب الوطن أكبر غني
ومتل الجبل . . واقف بوجه الريح
ورح قوم من تحت الحزن يا هالدني
صاحي متل ما قام من موتو المسيح .
_ عيسى فضة ْ
ليست هناك تعليقات:
إرسال تعليق