ذكريات ام شهيد.... للمبدع محمد عزو حرفوش

... محكيّة وطنيّة ...
.. ذكريات أم شهيد ..
صباحكْ خير ياإمي ..
ياوجع روحي ..
ياصور عم تمشي بدمي .
ياأوّل فرحتي ..
ياراسم بسمتي ..
يامنشّف دمعتي ..
يا أملي .. ياألمي ..
يا نبض عمري ..
لو تعرف شو بتذكرك ؟
وشو بحبّك ؟!.
بتذكرك لمّا خلقت ..
بتذكرك لمّا مشيت ..
لمّا جعت .. لمّا شبعت ..
لمّا مرضت .. لمّا شفيت ..
لمّا كبرت .. لمّا حبيت ..
لمّا طلعت  ..
لمّا رجعت ع البيت ..
بتذكرك لمّا رقصت ..
ولمّا غنيت .
ايييه والله ياإمي بتذكرك .
بتذكرك واقف ع الباب ..
بتذكرك فاتح كتاب ..
بتذكرك بالسهرة مع الشباب ..
بتذكرك ..
مسجّى بالنعش ..
ع كتاف الأحباب .
بتذكرك مالي عليّ البيت ..
صرت صورة ..
معلّقة ع الحيط ..
بشوفك كل يوم ..
نازل من الصورة ..
تبتسم ..
لمّا تشوفني مقهورة ..
تبوّس ايدي ..
تمسح دمعتي ..
تهمس لروحي ..
ارفعي راسك يا إمي ..
وافرحي من جديد ..
كنت ع الأرض بطل ..
وصرت بالجنّة شهيد ..
دمي فدا تراب الوطن ..
الصامد رغم المحن ..
يا إمي ولو طال الزمن ..
رح ينتصر ..
ويعمر من جديد .
بخاطرك يا إمي ..
بخاطرك يا إمي ..
يا محتسبة يا صبوره ..
تبوّس جبيني ..
وترجع ع الصورة .
الله معك يا إمي ..
الله معك .
رح يبقى الوطن ..
تاابقى اتذكرك .
كل يوم ..
رح صلّي الفجر وادعيلك ..
واحضن الصورة  ..
لآخر العمر وغنيلك ..
وكل ماشميت البخور والعطر ..
وهلّت بشاير النصر .. اتذكرك ..
الله معك .. الله معك .
يا حبيبي ..
يا خالد عند ربّك ..
آآآآآآآخ يا ضو عيوني ..
لو تعرف شو بتذكرك ..
وشو بحبك .
رح ابقى ياعمري ..
اتذكرك .. واتذكرك .. واتذكرك .
آآآآآآخ يا بنيي !!
ليش أنا نسيتك ..
حتّى اتذكرك ؟!.
قبلاتي لأيادي وجبين كلّ الأمهات عموماً ولأمهاتِ الشهداءِ خصوصاً .
.. محمد عزو حرفوش  ..