ست الجمال
يا بنت سكر هواكي بقلب قلبي ذاب ..
حسنك بجوهر حلاكي ومش حلاكي ثياب .
فتشت عنو بسماكي وبسأل النجمات ..
قالوا الحسن بالبدر حتى البدر لو غاب .
يا بنت بدرك كمالو ما يصير هلال ..
مهما نبذتي من مدارك أو جذبتي شهاب .
يا بنت حسنك توجك ست الجمال ..
ست الصبايا بحسنك وست الشباب .
يا بنت بدن معبدك تيقدموا لو نذور ..
والكل بدن رضاكي بيركعوا عالباب .
وكثار حرقوا حياتن ع مذبحك بخور ..
ولى البخور بمعبدك مثل الضباب .
يا بنت كتبوا بدفترك بعض الكلام ..
كتبوا الحلال مبطن بحبر السراب .
يا بنت بلسم هواكي حب مش أحلام ..
والقلب بدو القلب تينسى العذاب .
يا بنت حسنك سقاكي خمرة العشاق ..
وكاسة غرامك خمرها أحلى الشراب .
وكلمات قلبك إلي بتحرك الأشواق ..
وإحساس قلبي معك نبضو إلي جذاب .
يا بنت عمري مضى وصار الزهر ذبلان ..
إنتي سقيتي الزهر من مية الأحباب .
عندك رجعت زغير صاير ولد جهلان ..
ونسيت عمري المضى ونسيت شعري الشاب
تحياتي والورد
برصوم كساب
ليست هناك تعليقات:
إرسال تعليق