/ الموعد في حلب / شعر محكي
عندك جمال الروح أغلى من الدهب
وحبك نبيد معتّق بخابة ادب
مشتاق خمر الشوق عا كاس الحنين
قد القلب مَ اشتاق نتلاقى بحلب
بحلب انطريني ع اليسار وع اليمين
بعد الخطر مازال وارتاح العصب
رح جبلك من الشام باقة ياسمين
من ريحة التاريخ ع وراقا انكتب
من هون أول ما ابتدا التكوين
قال العشق بالشام للشهبا انتسب
روحي اغزلي الأحلام من تاج الوتين
وتكحّلي بالغار وغناني الطرب
ونحنا سوا رح نمسح الماضي الحزين
ونكتب ع باب القلب مرفوع العتب
ونرش ورد النصر عا كل العرين
بكرا بحلب هونيك بكروم العنب
رح خبرك عن سر من بعد النجاة
إنتي السبب تا ضل عشقان الحياة
ولولا هواكي كان ما عندي سبب . د. عيسى فضة
ليست هناك تعليقات:
إرسال تعليق