( معنى كمشة غزل ) مدين رحال
----‐------------------------------------
روحي البريئه عم تخاطب روحها
ياما سهر قلبي وبكي ع جروحها
عَلّقت آمال البنا ع صروحها
وياريت أعرف بالحقيقة طموحها
مخنوق أسراري مَ فيي بوحها
ولا قدرت إركب في سفينة نوحها
متل النبي أيوب صابر ع الألم
تا صرت ورقه و الهوى بيلوحها
----‐---‐----------------------------
مجنون ليلى ل كان بالماضي جريح
وروحو ارتاحت بعد مازار الضريح
ومثلو أنا واقع بهالحاله كسيح
وعاشق صبيه من قلب صادق صريح
لَ بتعترفلي بحبها تا إستريح
ولا صارحتني بحقدها تاحط زيح
بين السما والأرض روحي معلقه
ومتل الشجر واقف صرت بمهب ريح
------------------------------------------
صرتي ب روحي مثل جمره حارقه
وصرتي ل مهجة قلب قلبي سارقه
بشوفك الشمس الدافيه والشارقه
ب نسمة هوى ريحة عطورك مارقه
المفروض قلبك يشعر ب حُبّي أنا
مازال روحي عابوابك طارقه
-------------------------------------
كلماتي وبقلمي انا مدين رحال
من الأرشيف
ليست هناك تعليقات:
إرسال تعليق