بس كلمتين}}
تتذكروا بلدنا الأم بعام الألفين
خيرات ومحبة والناس متحابين
وأعياد وأفراح والشوارع مزينين
كل بيت فيه ورد وشجرة ياسمين
وأولاد بالحارة عم يلعبوا مبصوطين
بيت الفقير في جرتين غاز ملايانين
وعلى السطح براميل مازوت معباين
ومونة بيت بتكفي عيلة شهرين
فجأة وقفت الضحكة وبكت العين
ليش شو صار اسمعوا يامحترمين
كنا بخير وسعادة و صرنا مشحرين
الناس يا حرام كلهم غلبانين
طوابير واقفين على البنزين
ومنهم ساعات للخبز ناطرين
وجرة الغاز بدها لتطلع شهرين
بتخلص بشهر والثانية غالية بدين
بتنزل على السوق البضاعة ضعفين
التاجر بقلك هلق احسن من بعدين
بتروح الأم لتشتري ثياب لولدين
بترجع وحاطة على راسها عصبتين
وراتب الموظف بيخلص بيومين
اول يوم مصروف والثاني وفي دين
والعامل مشحر على الحالتين
يادوب يكفي أجرته سندويشتين
وفي ناس عايشين مو سائلين
كل يوم بيجهن ألاف وملايين
سرقة والأشراف منهم محتالين
على كتاف الغلابة والمساكين
ياحرام شو صار بسبع سنين
ياترى منرجع متل ما كنا عايشين
ولا منبقى هيك طول العمر ناطرين
على الأمل ونواسي بعضنا بضحكتين
بدها دعوة صالحة لرب العالمين
يارب تفرج همنا وهم كل المهمومين
{{أبو علي العاجي }}
26\9\2020
ليست هناك تعليقات:
إرسال تعليق