شعر بالمحكي ..
حال الناس ،،،،،
تعالوا نحكي عالمكشوف
ويا الله نسمع وياالله انشوف
وما عادت الناس استحت
وحطوا الحيا عالرفوف
باعوا الضماير بالمصاري
بالزيف الوجدان ملفوف
بدلوا النخوة بالخيانة
والأصالة عليها مأسوف
الصادق صار مضحكة
والشياطين بتعد ألوف
كذب ونصب واحتيال
قتل ببارود وسيوف
متل وحوش الغابة صرنا
نهش اللحم من الكتوف
الشاطر فيهم علي بابا
والحرامية صفوف صفوف
الشهامة صارت عار
والباطل غالب معروف
كلشي حلال وما بيهم
والمهم تتعبا الكفوف
الخجل عملوه عيب
بيتحججوا بسوء الظروف
حروب وجهل وفقر وقتل
مضطرين ديب وخاروف
صرنا بدوامة عايشين
وبالدولار صار المصروف
لا رحمة بقيت بالأرض
ولا يغيث أحد الملهوف
الدنيا عملناها غابة وحشة
والنفوس للشر تهف هفوف
فيها القوي شايف حالو
مستضعف يضرب بالكفوف
حلت لعنة الله علينا
من الظلم ما عدنا انشوف
الشاطر بيحاول يكسب
بيقول ليش أوقف مكتوف
أعيش اليوم وبكرة بتفرج
وناسي حسابه عالمكشوف
هو الموت بينهي القصة
وياغافل نحنا بالدنيا ضيوف .
بقلمي : فواز محمد الحلبي
3/2/2021
ليست هناك تعليقات:
إرسال تعليق