( دعسة ناقصة ) محكي
بدروة قمر كنتي الأماني بتغزلي
وعم تسبحي بنهر الخيال وغايصا
جاكي العشق يرقص بقلبك حنجلي
رقصتي معو بجنون أحلى مراقصا
شلحتي حجاب الليل رحتي تختلي
بين العتم والضو خلوة مناصصا
لبستي قميص الشوق لونو مخملي
عملتي على زرار العراوي محاصصا
وصرتي متل شهد العسل تتعسّلي
وبين العسل والشهد صرتي حايصا
طلعتي ع كرم اللوز حتى تعملي
مرّة مزاد . . . . ومرتين مناقصا
ولمّا استوى العنّاب عنقودو حلي
كنتي على صابيع قلبك لايصا
عم تطلعي مرّة وعشرة بتنزلي
فاق وصحي الناطور كنتي خالصا
عم تقطعي نهر الحلم صوب الصباح
دعستي ع أول ضو دعسة ناقصا .
- عيسى فضة -
ليست هناك تعليقات:
إرسال تعليق