وحدي معك يا ليل ورفيقي السهر
بعز النعس سهران عا سطح الوعي
مع صوت هالمزراب وغناني المطر
بلهفة عشق مجنون بندهلك تعي
قبل الوعد ما يشيب عا بحة وتر
وما يعود فيكي صوت قلبي تسمعي
كل ما ع بال الذكرة طيفك خطر
بشوفك متل لمعة قمر عم تلمعي
بخربط أنا ما بينك وبين القمر
وبيصير جمر الشوق يكوي مدمعي
إنتي بحياتي المبتدا وإنتي الخبر
حبل التلاقي بخاف إنّك تقطعي
ولمّا حنيني بدن أشواقي اختمر
صوتك مرق متل الصلى عا مسمعي
حسّيت إني صرت بيلمح البصر
متل الجمر شعلان بحرق موضعي
وفيكي أنا محبوس برّات النظر
وإنتي ع برج النار فيي بتطلعي
ومتل اليتيم بقيت ع غيابك أنا
وناطر ع باب الليل حتى ترجعي .
- عيسى فضة -
ليست هناك تعليقات:
إرسال تعليق