أم زعرورة
وأنا قاعد أفكر في حالي
عدت عليا بنت حلوه صغيوره
فيها براءة الدنيا وشها زي القمر
وعامله في شعرها زعروره
تجري وتلعب وتتنطط بخفه
تقولوش يا ناس عصفوره
سألتها عن إسمها ضحكت وقالت
اسمي حلا بيدلعوني ب سنيوره
فضلنا نتكلم سوا وترد عليا
بكل لماضه أما حتة بت شطوره
أخدتها في حضني وبوستها
لما لقيتها شاطره وأموره
جالي أبوها يضحك وسلم عليا
وأخدنا مع بعضنا أجمل صوره
وراحت تكمل لعبها وتشاور من بعيد ليا
وعيوني بيها سعيدة مبهوره
بكره تكبر وتفهم الدنيا أكتر
وتكون بإذن الله واحده مشهوره
بس يارب تفضل كده وما يتقلب حالها
وتتغير لواحده تانيه متكبره ومغروره
دعيتلك روحي ربنا يصونك ويحفظك
وعن عيون الحاسدين تكوني مستوره
** هشام فرغلي **
ليست هناك تعليقات:
إرسال تعليق