بقلمي الحاج هلال
........................
عيد الحب هل ياعالم
والعيد إيه ماتقولي عليه
نص العالم للتانى ظالم
ليه الظلم ياعالم ليه
وفلانتين يافلانتين
فين الحب وليه مش باين
والحق بين العالم هاين
فين يكون العدل ونايم
واللى جاب للحب هديه
وفلانتتين للمدام
وللحبيبه والخطيبه
فعل حقيقي مش كلام
والهديه من عينيه
بس قولولي العدل قام
عوزين حب ويبقى دايم
وعدل يخلي العالم سالم
يا فلانتين يا فلانتين
هو فين الحب ياعالم
ونص العالم عالتاني قايم
مين ياعالم للحب خاين
نص مظلوم والتاني ظالم
ظاهر يابا الظلم وباين
نص متكبر عالتاني يقهر
والهاين مدفون مش باين
فين الحب استرها يا رب
وفلانتين يا فلانتين
عيد الحب بين قلب وقلب
وهدايه وتعبير في الحب
والدنيا مقسومه نصين
بين أمريكا وبين الصين
وروسيا داخله وبرضو إيران
والغالب بيزيد في الضرب
ناس فرحانه وناس غلبانه
والغلبان بيزيد في الغلب
أم يتامه وناس متلامه
وللأيتام فين هو الحب
وفلانتين يا فلانتين
أقلام تكتب أحلى كلام
والأغاني و الأفلام
في السهرات والحوارات
والحفلات و مسلسلات
أسرياء هاي هاي وزوات
والفقراء تحت الأقدام
مش لاقيين للبطن طعام
ولا في الشتا لاقيين الغطا
قولي حلال ده ولا حرام
يا فلانتين يا فلانتين
عيد الحب وهل ياعالم
عيد إيه وحب إيه
رد عليا وقولي يا بيه
كل مكان فيه حرب وضرب
في القنوات وشتيمه وسب
طب ليه قولتوا يوم الحب
فين البغض وشاوروا عليه
هاتوا خريطه وشوفوا بعنيكم
تلقوا أيادي منكم فيكم
كل مكان حرب وطغيان
وجاي تقولي عيد الحب
ليل ونهار شغال في الحرب
رد عليا وقولي يا بيه
فين الحب متقولي عليه
ليه العالم مجرم ظالم
قايم نايم طاغي يهاجم
وجاي تقولي عيد الحب
فين الحب وروني ياعالم
وفلانتين يا فلانتين
أنا مش واقف ضد الحب
ولا إنسان منزوع القلب
بس يا ريت الحب ياريت
حب حقيقي يرضي الرب
حب الناس نيه وإخلاص
من غير كدب ومن غير نصب
وفلانتين يا فلانتين
عيد الحب يا عيد الحب
...................
الحاج هلال في
الفلانتين
ليست هناك تعليقات:
إرسال تعليق