وحدك خلقتي إلي من مطلع التكوين
ضلّي اضحكي ضلّي افرحي لا تعبسي
صرتي قدر مكتوب ع جبين السنين
من أكسجين الحب ضلّي تنفّسي
وشدّي حزام الشوق عا خصر الحنين
حارس أنا وعا باب قلبك محرسي
وفرشت تختك من عبير الياسمين
نامي اطمئنّي وقت إنتي بتنعسي
عملتلّك الإسوار من نبض الوتين
ولبّستك من الروح خاتم محبسي
باسمك أنا طوّبت حالي عن يقين
ولسّا سهام الظن فيي بتغرسي
مازال قلبي ع الوفا حالف يمين
حاجي ياروحي جنون غيرة وهلوسي
سجّلتك بدفتر نفوس العاشقين
إنّك إلي كلّك إلي يا حلوة الحلوين
يعني كفاكي هيك تبقي موسوسي .
- عيسى فضة -
ليست هناك تعليقات:
إرسال تعليق