( دعسة ناقصة ) شعر محكي
بليلة قمر
كنتي الأماني بتغزلي
بمغزل حلم
مجهول بلّش ينجلي
وعم تسبحي
بنهر الخيال وغايصة
جاكي عشق
يرقص عَ بابك حنجلي
رقصتي معو
من بعد ما كنتي إلي
وصرتي متل
ملهوف تحكي ولايصة
لبستي إلو
فستان أحمر مخملي
عملتي على
زرار العراوي محاصصة
صرتي متل
شهد العسل تتعسّلي
طلعتي
عَ كرم اللوز رحتي تعملي
مرة مزاد ومرتين مناقصة
ولمّا استوى
عنقود عنّابك حلي
فاق وصحي
الناطور كنتي خالصة
عم تقطعي
نهر الحلم صوب الصباح
دعستي عَ أول
ضو دعسة ناقصة . عيسى فضة
ليست هناك تعليقات:
إرسال تعليق