/ما انا واحد من هذوك
----------------------------/
( زجل)
ما انا واحد من هذوك
ما انا حرف ايخرف..!
ما انا كلمة اتحاجي.!
نحكي ليك نحكي ليك
على ناس........ضاعوا!
نحكي على جماعة جاعت
نحكي على رباعة ضاعت
نحكي على ذيك القبور الرايبة
والشاهد إلى غاب قلت الفايدة
حكموا حكموا باحكامكم أوين
عطيت عليك يا الزين تعالى.!
تعالى نتبادلو لكلام
وانغني....ليك انغام
اللي قالوا الناس لقدام
قصة حمو ولد لحرام
على السعد لكحل اوما فيه
راه عرس الذيب غير كذبة
ذيك ليام الفايتة
ذيك لحلام البايتة
كانت الطيور طاايرة
عادت لقفازها احديد
كانت النفوس....حايرة
سكنت ف قبور الدوام
شلا وحدين صيحوا
شلا وحدين حيحوا
اعطاوا الخد للتراب
مالك انت يا سعد السعود؟
ساكن فوق شوكة او عود
تحسب ليام......بالدقيقة
ذيك اللي دازت ما اتعود
الحمد لله.......كاملين
احنا فالتربة ساكنين
فالاحلام امسافرين
ما بعنا.......ما شاريين
فالواقع احنا عايشين
الحمد لله..........كاملين
غير بالشوية امسلكين
الخبز و الما واجدين
العيشة عيشة الراحلين
ذوك اللي فالدنيا قانعين
*( ايا يكن تستمر الحياة ونعيش كما أراد الأخرون لا كما
نريد نحن)
العابد عبد الرحيم: 04/02/2021
الفقيه بن صالح تكتب وتكتب
ليست هناك تعليقات:
إرسال تعليق