/ شهقة شوق / محكي
تسطّح معي ع فراش إحساسي
وخلّي هواك يكون ع قياسي
تتصير روحي فيك مسكوني
عبّي رضاب شفافك بكاسي
اسكرني ع شهقة شوق مجنوني
وفضّي سهر عينيك بنعاسي
شو بحب إبقى فيك مسجوني
عيونك معي بتكون حرّاسي
وكلّي إلك رح صير مرهوني
فوت بحنيني واسمع جراسي
وحدي ع تخت القلب رح لاقيك
بغطّيك بشفافي أنا وبخفيك
ما بين تلج ونار أنفاسي
قال لها :
مشتاق فيكي كون وتكوني
شهوة عسل معسول بحواسي
وتبقي ع صدر الروح أيقونه/ي
وأول مقيمه تفوت عا راسي
رح إحبسك في غرفة عيوني
مع كل رفّة رمش تنباسي
ع فراش إحساسك أنا ما بنام
رح ضل صاحي والدني ناسي.
- عيسى فضة -
ليست هناك تعليقات:
إرسال تعليق