/ كلامك كلو كذوب
-----------------------/
(زجل)
سار كلامك كلو اكذوب
وانا عاشق لقليب كيذوب
سار كلامك........كله كذوب
واش مكتوب ما منو هروب؟
قولي لي يا شمس لغروب
شرحي لي التيهان فالدروب
مول الحب دايم ف حروب
حاير قلبو.....وسط لقلوب
وانت غافل علي اتجوب
ما اقريتي فسرتي اكتوب
*مالك مالك في هاذ الزروب؟
خلي اوقييت لنا فالنهار
راه القليب مكوي بالنار
وانت طاغي غالب جبار
ما اتسوقتي....لينا اخبار
وانا قلبي الساعة بانهار
*حرام عليك يا الجافي حرام
امسح ادموعي...شي يوم نرتاح
يمكن يهدن لقليب ينسى لجراح
يمكن انقول لك يا خويا احرام
عاد الشهر عندي محسوب ايام
عادت اسوايعو محسوبة بعام
انا قلبي لونو...لون التراب
انت قلبك لونو لون لغراب
*لا تواسيني لا اتقول لي احبيب!
دقت الحب امعاك صدق لي اعذاب!
خليني خليني انسول ناس الغرام
راه ضاع حبك في وقت الزحام
غير احبس في صدرك كل لكلام
ملعون حبك ملعون طول الدوام
العابد عبد الرحيم: 13/02/2020
ملهمتي الفقيه بن صالح
ليست هناك تعليقات:
إرسال تعليق