شعر شعبي
ساكن بدم الوريد
إشتدت عليَّ سود المزن من بعيد
وآنه بغربه وألم وحدي ويا الجليد
مهمش بحياتي والوكت مني شيريد
ضاع العمر تاليها يا وسفه شيفيد
لا فرح يدگ بيباني ولاني سعيد
بس حزن مرسوم بحياتي حيل عنيد
لا يقبل يفارگني وأرجع من جديد
بس الله يدري بحالتي وهو الشهيد
أنته البعيد بگلبي ساكن بدم الوريد
وتدري زين إشگد أحبك يا الوحيد
لو يبعد عني صوتك تراني بحزن شديد
وأدعو ربي بصلاتي يعيدك وما يفيد
من تجيني بأحلامي صدگني عندي عيد
زاد حده صبري وجزه وگلبي مو حديد
نعسانه عيوني ولا تقبل تنام ما تريد
چنت أحلى شي بحياتي وشمعة تقيد
رسائل أكتبها إلك بحبر شرياني وأزيد
سلامي وأشواقي يحملها طير البريد
لعيونك أهدي من الشعر أجمل قصيد
سلال الورد هديتي إلك ذبلن بلا مواعيد
بقلمي براق فيصل الحسني
ليست هناك تعليقات:
إرسال تعليق