/ حبي الوحيد / محكي
كل ما رضاب شفافك معسل بدى
وصابيع ورد ترش من عطرك ندى
شهوة عشق بتفيق عا تخت الوريد
وبيكون قلبي صوب عينيكي اهتدى
قلتي يا شاعر هات سمّعني المزيد
ملهوف قلبي بالشعر يمرق حدى
بلون الغزل . . حامل قصيده بإيد
وشايل بتاني إيد أحلام المدى
ولمّا كنت فايت على بيت القصيد
حسون شعري غط عا غصنك شدى
معجوق فيكي . . وبلّش التغريد
مع نغم صوتك صار موسوعة صدى
وحتى تكوني للأبد حبي الوحيد
فوتي من بواب القصيده ع الهدى
تتصير فيكي حروفها بطعم النبيد
وبصير إشرب كاس من خمر الرضاب
وبيكون ميلادي بعينيكي ابتدى .
- عيسى فضة -
ليست هناك تعليقات:
إرسال تعليق