بيسألوني ... محكية للمبدعة ساحرة الحرف إنصاف قرقناوي

بيسألوني ليش بحبك يا حلب..

مدري دهشه..

مدري عتب..

و يمكن حيرة..

و يمكن عجب..

و لو فتحوا بس طرف قلبي..

أو سحبوا نتفة من دمي..

رح يلاقوكي موشومة بحروف من دهب..

و لو بكوا عيوني..

رح يشوفوكي بدمع عيني اللي انسكب..

و إن شقوا لحمي..

أو شطبوا من هالحياة إسمي..

رح يقروكي بحروف القصيدة..

و كل شعر و غزل بحق حبك انكتب..

اي بحبك يا حلب..

ومالن حق يستفسروا أو يسألوا..

لأنه عشقك هيك من الله مالو سبب..

انت أرضي..

انت أصلي..

انت وصلي..

انت الغرام اللي لأجله بهون كل التعب..

بقا يا ترى رح يفهموا ليش بحبك يا حلب؟؟

#إنصاف_قرقناوي