يا ريت... شي كوخ زغير معربش ع شي تلة
كون قريبة من الغيمات ومن السما عيوني ملّي
وأسمع صدى من بعيد عم ترغل ترغلّي
ع شباكو يوقف بلبل يذكرني ب حبيبي ال غاب
لملم دمعات العين وقول يا ريتو عليّ يدق الباب
حابة عاتبو بكلمتين وقلو مش هيك بينتسو الحباب
أدّام الباب وع كرسي صغير صبّ القهوة بفنجاني
وبين الشفة والشفة تمي يرجف وأزعل ع العمر الفاني
وأبكي على حب بعيد والله كان بيهواني
وترجف إيدي بالفنجان كيف هيك جافاني
ومن الضجر وكتر الزعل بالفكر دماتي مغلية
قول لحالي يلا نقوم نتمشّى شوي بالفية
ومن التعب أقعد ع حفة ساقية رشرش ع وجي مية
مشيت بالعمر زواقيق
وقلت أرتاح شوي تحت شجرة صفصافة
ومن الدهر وكتر القهر ما حسيت ورحت غافية
حلمت برجعة حبيبي و ببكرا جديد
وفجأة صحيت ع صوت بلبل
بيقلّي حاجة تحلمي
حلمك صار كتير بعيد
ما تحلمي يرجعلك عيد
رجعت والدمع بعيني
وما طالع شي بالإيد
بدي... شي كوخ بعيد
إيمان...
ليست هناك تعليقات:
إرسال تعليق