بمناسبة عيد الأم
إلى أمى وكل الأمهات
(ست الغاليين)
أمى ياست الغاليين
يارحمة من رب العالمين
يانور حياتى ودنيتى
يابحر الدفا والحنين
تسع شهور وانا جواكى
حملانى بتآسى الأنين
فى عذاب ووهن وضعتينى
والطلق كان زى السكاكين
وفى الرضاعة سقتينى
حنية من صدرك سنتين
بعد الرضاعة فطمتينى
وعنيكى ليّا كانو مراقبين
ومسكتى إيدى داده داده
خطوه خطوه يانور العين
وكنت أنام وإنتى بتصحى
تطلى عليّا الساعه إتنين
وتغطى جسمى تبوسينى
بوستين ببسمه على الخدين
ولو مرضت تشيلى همى
وتسهرى والناس نايمين
تفضلى صاحيه وقلقانه
رايحه وجايه شمال ويمين
وتدعى ربنا يشفينى
وعشانى قلبك يبأه حزين
بعددا كله أفرحبك يوم
وإنتى اللى عشتى عشانى سنين
دانا أبأه ناكر لجميلك
وأباه ليكى من الجاحدين
عيد الأم دا ليكى قليل
عيد الأم دا عادة وروتين
عيد الأم دا يوم ويفوت
عند إللى بس محتفلين
عيدك فى قلبى شموع علطول
طول مانا عايش ليكى قايدين
من غير رضاكى مش رابح
لا دنيا ولا جنه ولا دين
ومهما أهديكى يا أمى
طول عمرى هافضل ليكى مدين
بتحلا دنيتى بوجودك
وبعد منك أنا مسكين
بدعاكى يملا طريقى النور
وجنتى تحت القدمين
الحق قال فى سورة لقمان
قرآن عن فضلك فى آيتين
وفى الإسراء بعد عبادته
أمرنا نحسن للوالدين
ياللى إنتا حافظ القرآن
فى الآيه تلاته وعشرين(٢٣)
أمك أمك ثم أمك
حديث لخير المرسلين
(أمومية)
الشاعر
رضا عبد الحميد
ليست هناك تعليقات:
إرسال تعليق