الدنيا كدابه
خواطر بقلمي
زغلول الطواب
تيجى الأيام وتعدى
زى السواقى القلابه
نازله طالعه ما تهدي
كيف الناس الغلابه
إللى يباتوا فيه
يصبحوا عليه
طافحين المر وشرابه
الناس عايشه الدنيا الكدابه
شمس بتشرق وقمر يضوي
ساعه نضحك وساعه نبكى
وإللى شايل الهم
دموعه عالخدود تجرى
من شدة الألم وعذابه
وناس سعداء الحظ
شايفين كل الأيام وردى
حاسين بطعم السعاده
عايشين في قصور وبساتين
وارثين أموال الناس النهابه
عاشنها بالطول والعرض
دنياهم يا ولدي ضحكه كدابه
تاخد من العمر الأيام الوردي
وتضحك عليهم بإبتسامه بهتانه
عمرها ما كانت عند الكل وردى
هي الدنيا كده كدابه
عاشق هيمان سهران الليل يغني
وشقيان هده التعب نام بدرى
عاشق بالسهر هيمان
الفكر سارح حيران
كأنه بجمر الشوق مشوى
بيبكي من السهد وعذابه
حتى النايم عاشق حالم
يصبح عليه الصبح يشكى
طول الليل حبيبه معاه
يصبح الصبح ما يلقاه
هى كده الحياه كدابه
الحلو فيها يخلص بدرى
ويفضل طعم المر مستمر
عالق في حنك العشاق الغلابه
كم من مره صدقت كلامك
وكان يعتريني الإندهاش
توارت دهشتي مع أفعالك
لما بانت حقيقتك يا ندل
وطلعت كدبه متسواش
كنت فاكرك زي أول مره
لما قابلتك وشوفتك
حسيت كأنك إبن ناس
ولما عاشرتك وفهمتك
عرفت إنك ملك الطناش
وبتعشق الكلمه الكدابه
أصبحت اليوم بالنسبالي
كيف ضل شمس الشتا
خيال باهت وخلاص
على رأي شاعر الفصحى
يا من ترتدي قناع ورد الصباح
هل نسيت ترتديه في المساء
قمر المساء يا كذاب للرؤي فضاح
كن صادق الكلمه تجني السلامه
بيقولوا الكدب عمره ماكان برجلين
وإنت تقول كلامك الصبح
وترجع تنساه بالليل
كداب وكدبك بيبان عليك
وكأن الكدب عندك موتور بروحين
بشوفك في اليوم بألف وش
فاكر نفسك ماهر وخداع في الغش
ناسي إنك كداب وبكرش
يا خايب هيفيد بأيه قناع الخيابه
حرام عليك تخدعني وتوجعني
عمر الخداع ما كان في يوم قناع
بتلبس كل يوم وش وتلوعني
لابد من يوم الحق فيه
يشتكي من شدة ألم الأوجاع
حتي لو كنت شاري مش بياع
هتبيع كلامك بالرخيص
ما ينوبك من وراه إلا الملامه
انا شاعر برقص القلوب بكلمتين
يدوبك بس هما كلمتين وخلاص
الأولي يا ليل والتانيه يا عين
لو الكلام بيتباع كنت بقيت ملياردير
إللي أقوله الصبح أقول أكتر منه بالليل
لكن أنا بطبعي صادق المشاعر والحس
تقتلني الكلمه الكدابه
أحكم الكلام ما قل ودل
مفيش داعي للرغي والهري
ياما اللسان يا صاحبي بيذل
مش بكتر الكلام والكدب
هتعيش دنياك مرتاح
أيام الدنيا يا ولدي
كيف السواقي القلابه
خواطر
زغلول الطواب
ليست هناك تعليقات:
إرسال تعليق