لما كنا صغار
كنا نفرح بعيد ميلادنا
ونقول خي كبرنا سنة ..
لما كنا صغار
كنا نوقف على كرسي
حتى نشوف حالنا كبار...
لما كنا صغار
كنا نكره نوعى بكير
حتى ما نروح عالمدرسة...
لما كنا صغار
كنا نقول أيمتى منكبر
ومنخلص من تسلط اهلنا..
لما كنا صغار
كنا نعد الايام
وننتظر انو تمرق السنة
حتى نكبر سنة..
شو كان عنا بساطة بالتفكير.
كانت البراءة موجودة ..
ما كنا عارفين
الدني شو فيهامتاعب
وانو الحياة بتقتل البراءة
لما كبرنا صرنا
كل ما قرب عيد ميلادنا
منشعر بالحزن...
لانو كبرنا سنة ...
ومنتحسر على ايام
راحت ما عرفنا نعيشها
متل ما لازم...
لما صرنا كبار
رجعنا نتمنى
يرجع الزمن لورا
نعيش طفولتنا
اللي سرقتها الايام..
نرجع تلاميذ
نحمل الشنطة
نروح عالمدرسة ...
نلعب مع رفقاتنا
وما يكون عنا هم
غير كيف بدنا ندرس وننجح
وناخد مكافأة
لما نجيب دفتر العلامات..
نفرح بتياب العيد....
نحضر برامج الاطفال
وبوقت محدد بس نهار العطلة...
يا الله شو في اشياء
منتمنى نرجع نعيشها
ما كنا عارفين قيمتها
وقت اللي كنا صغار...
بقلمي هيام برهان
ليست هناك تعليقات:
إرسال تعليق