السلام عليكم: حوار زجلي
بين : توأم الزجل :
مدين رحال : احمد محيدلي:
موضوع (الأرض والسماء)
البداية : احمد محيدلي
رحّال أوعا تْطلّ و تسلّ السيوف
إلاّ اذا بردخْت شفرات الحروف
يا كون فاتح ملعبَك للثرثري
يا كون فاتح منبرك للفيلسوف
............................
مدين رحال
خدها ع ذات القافية بأجمل حروف
وببردِخ حروفي معك حسب الظروف
لما بحاور طفل بعمل ثرثري
ولما بحاور شاعر بسل السيوف
................................
احمدمحيدلي
بْ صَفّي نمُورة و انْت من تاني صفوف
صْفوف النمورة غير نمّورة و صفُوف
لا مطمعي متلك بصَفّي ثرثري
و لا قدرتك متلي تصفّي فيلسوف
.................................
مدين رحال
شوصايبك عامل نمر كاسر عضام
ومن ميل تاني فيلسوف بوجه عام
ثبتلك ع حجة حاج تتخربط معي
يمكن انت صاير بحالة انفصام
..................................
احمدمحيدلي
طل ّ سيدنا علي للمرجلي
و من ميل تاني بالبلاغة أوّلي
نهج البلاغة و الحرب شهدو إلو
و نفْس البلاغة و الحرب شهدو إلي
...................... .........
مدين رحال
سيدي علي للمرجلي وأشرف إمام
واكبر مدينة علم ياأحمد فهام
لا تحط اسمك مع صفوف الخالدين
ضلك معي عاقد حجمك بالكلام
...................................
احمد محيدلي
مع مين بدي حط اسمي اللي سما
ما زال عالي المرتبي عم ينسما
ن حطيت اسمي جنب اسمك يا شريك
بينزل ع سابع ارض من سابع سما
..............................
مدين رحال
لاتمدح بنفسك وتخسر هيبتك
وتعمل متل ابليس زادت عيبتك
بين السما الارض موضوعي اجا
حتى مع الجمهور تظهر خيبتك
.................................
احمدمحيدلي
لوما السما تشتّي ع سهل و منحنى
ما في حياة على الأرض الاّ الفنا
و لوما سَمايي ما حدا زرعو نَمي
و لا ضايَنِت بالشعر لولايي انا
...............................
مدين رحال
الله خلق هالارض ت نعيش بهنا
ونزل الخير من السما محبة لنا
مافي بشر عاشو وهم فوق الغيوم
وعايش مع النجمات عاايا بِنا
................................
احمدمحيدلي
هالخير لو عالأرض كان و بالحِما
مش بالسما بتخلَق الجنّة و إنّما
لو الأرض افضل.. وقت ما آبليس آنطرد
ما نزّلو عالأرض الله من السما
..................................
مدين رحال
هيكي نزل ابليس من شرو الوخيم
لولا ستقام بيرحمو الرب الرحيم
يمكن انت ابليس تاني بالسما
رح تنزل على الارض ياتاني رجيم
................................
احمد محيدلي
لوما عرفت تصيب لو ترمي بلاك
ح تزتّ حالك فوق عتبات الهلاك
اللي بْينزل عْلى أرضَك بْينزل آبليس
و لي بْيطلع عْلى جنّتي بيطلع ملاك
......................................
مدين رحال
الحجة على ابليس مَنْها بيّني
حسابك انت وياه عالرب الغني
نزلو جميع الانبيا عاأرضنا
ت يطهروها من بليس الشيطني
......................................
احمدمحيدلي
هالأرض مِليِت بالمكر و التعلَبي
و الانبيا ل طلّو عطوها مرتبي
و عا هالدني من وين طلّو الانبيا
و أيا رسالة من الأرض عملت نبي
......................................
مدين رخال
وقّعت حالك بالغلط في مُنطقو
يااحمد الجمهور شعرك طَلّقو
قلي دخيلك كيف نزْلو الانبيا
بالارض يما بالسما عم يخلقو
.................................
احمدمحيدلي
خِلْق التقي عا ارضَك و خلق الشقي
بسّ النبوّة وين حَصّلها التقي
فوق الأرض روح آلتِقي بمْسَيلَما
و بالأنبيا فوق السما رح إلتقي
...............................
مدين رحال
بأمر السما لولا حدا تسجل نبي
لوما آشتغل عالارض وين المرتبي
متلك بتكتب اسمك كبير الزجل
ومالك فعل باين عأرض الموهبي
....................................
احمد محيدلي
فعلي انا تْلاميذ منّي مخرّجي
و للموهبي عْطيت العقول المنتِجي
مع غيرنا بيبيّنو كلْما إجو
لكن معي ما بيّنو كلْما إجي
..............................
مدين رحال
بين السما والارض هالموضوع دار
لاتفتكر تهرب على تاني مسار
عطينا حجج نزلت علينا من السما
حاجي على الشعار عم تضرب حجار
........................................
احمدمحيدلي
مش احمد ب يهرب و عن دربو بزيح
ن بدَّك حجج إلقى الحجج ت تستريح
بتحبّ تحت الأرض إنك تندفن
يما بتطلع عالسما متل المسيح
.................................
مدين رحال
خدها ع ذات القافية بمصدر صريح
وبين السما والارص لازم حط زيح
ال متلي ومتلك مدفنو تحت التراب
مافيك تتشبه ل فادينا المسيح
................................
احمدمحيدلي
تحت التراب بيدفنوني إنّما
روحي بترحل للسما لْ إلها حِما
تْمَرجَل ع مَوتك و آندفَن تحت التراب
و مْناع انو الروح تطلع للسما
................................
مدين رحال : ختام
بين السماوالارض لاتعمل سجال
بحثك عقيم ومابينفعني الجدال
هالكون الله خالقو ب حسن وكمال
ومرتب الدنيي على اوسع مجال
مافيك تلغي الارض وتخلي السما
ومن دون نور الشمس ماشفنا الجمال
........................................
احمد محيدلي :ختام
بين السما و الأرض هالحكي آنسما
و أشعارنا درّة بتاج اللي سما
دون السما و غيومها و غيث ل هما
كيف الأرض رح تستمر و تنحما
و دون الأرض هالجوّ ما لاقى حِما
و نور الشمس لو شع بيشوف العما
مْرايي نقيّة ما حدا مقابيلها
ايّا سما بْلا ارض ارض بْلا سما
...............................
الف شكر لكل من تابعنا والى اللقاء في حوار قادم
ليست هناك تعليقات:
إرسال تعليق