زجليّة محكيّة..
.. مشتاق..
بتتذكري حدّي من كنتِ تمرقي
تستحي ويضيع عَ شفافك الحكي
بين ضلوعي تتسارع النبضات
هدّي ياروح الروح شو صاير بِكِ.
عيونك سبحان الله ما أجملا
سواد الليل ب أناملو مكحّلا
حلوة وكلّ يوم عم بتزيدي حلا
تسحري القلوب وفيها تفتكي.
طيفك ملاك يسبح مع الغيمات
لحفاف الفجر تحرسو النجمات
وكلّ مَ تداعب خدودك النسمات
تتمايلي غنج و عَ كتفي ترتكي.
امسح عن جناحك بأيدي الندا
عطر أنفاسك يسحرني ع الهدا
اهمس بِ إذنك تَ ما يسمعنا حدا
دايب بحبّك لْمين بدّي اشتكي.
.. محمد عزو حرفوش..
ليست هناك تعليقات:
إرسال تعليق