ساعة عصرية
حكاوي بالعامية
الحلقة الحادية عشر
بقلم : محمد فتحي شعبان
صباح الخير ...مساء الخير ..اهلا وسهلا بحضراتكم ...موضوع النسيان ده صعب جدا ، منتشر مقولة الايام دي إن كثرة النسيان علامة من علامات الذكاء فأنا بكدة ابقي من أذكياء العالم ، فجأة اكتشفت إن أنا ذكي ( كلت الحلاوة يا ذكي ...مسلسل قديم من بطولة الراحل محمود القلعاوي) ، بنسي كتير ومش مركز طبعا ده مش ذكاء دي حالة تشتت ذهني ، حاسس إن أنا مش مرتب ومش منظم ، كل الامور والمواضيع متداخلة مع بعضها ، يمكن قلة النوم اليومين دول بسبب موسم البامية ( للناس اللي متعرفش أنا شغال في سوق الجملة للخضار أو الوكالة ) مش عارف أرتب أي مواعيد ولا انظم وقتي ، بنبدأ شغل أربعة الفجر بنخلص مع أدان المغرب يعني اليوم راح
وبهذا الحال أصبحت ذكيا جدا ، لدرجة أحيانا ببقي عايز اتصل بحد وماسك التليفون في أيدي وبنسي اتصل ، ومرة تانية كنت بنقري في كتاب منزلة علي التليفون وإذ فجأة اكتشفت إن التليفون مش في جيبي طبعا اتفجعت وادور علي التليفون والآخر طبعا كنت بنقري في الكتاب .
صباح الخير ....مساء الخير ...أيا كان الوقت عادي جدا ،
أنا شربت حشيش يا سعاد ، كنت في مكان ما و في نفس ذات المكان ناس بيدخنوا سجائر فيها حشيش ، طبعا الريحة وصلت عندي وحسيت بصداع وحالة غثيان ، تركت المكان ومشيت وفضلت أغني واغني واغني بس خلاص كدة .
الحياة حلوة بس نفهمها اي نعم بس نفهمها ، في ناس كتير معقدة نفسها وبيشغلوا رأسهم ونفسهم في الصغيرة والكبيرة ، لكن احنا أحيانا لازم نطنش ( طنش تعش تنتعش ) أضحك عشان الصورة تطلع حلوة ، حاول قدر الإمكان انك تتغافل عن بعض الأشياء عشان تقدر تعيش حياة حلوة ومتشلش هم كل حاجة لأن ربنا خلقنا ومتكفل بينا فا متشغلش بالك كتير ، الحياة حلوة بس نفهمها وده طبعا مش من أثر الحشيش ولا حاجة.
صباح الخير ....أو مساء الخير
ليست هناك تعليقات:
إرسال تعليق