( مفرق العيدين )
عا مفرق العيدين وقّفت السني
حوّلت حالي صوب حالة حالها
تا شوف شو اللي صار بالحلم الهني
فضّيت أيام السنة بغربالها
وبلّشت هزّ بها لخوالي المحزني
وتدّحرج الآهات فوق خيالها
شفت العشق ختيار ماشي منحني
عكّازتو ع الجرح حطا وشالها
والأنترنيت سرقت حياة الولدني
وصهلة فرس بتنوح عا خيّالها
وشفت الأرض بالبهرجات مزيّني
والجوع عامل مهرجان قبالها
والغاز صاير ع الخريطة يا دني
والكهربا عم ترقص بخلخالها
وفوق الفقر بتمر دعسات الغني
ونسوان عم تمشي عضهر رجالها
طل وسألني العيد قلّي شو بني
جايي الفرج غنّي معو موّالها
واتضحكي بهالعيد ضحكة سوسني
حتى الدني تضحك إلك أحوالها
وآخر وقت عم ودع العام العتيق
مالقيت بالغربال غير رأس السني
وعا شجرة الميلاد علّق شالها . د.عيسى فضة
ليست هناك تعليقات:
إرسال تعليق