يا صاح شايفك ملبّك ومحتار
لا ليلك ليل ولا نهارك نهار
ارمِ همومك عَ ربّك الخالقك
صار العمر كلّو متل لعبة قمار.
انسَ أيام الغندرة ورش العطر
تلميع الكندرة وتصفيف الشعر
أيّام عم نعيشها حرمان وقهر
الفاجر فيها بيطلع سوبر ستار.
لا تلوم حالك يا صاح لا تلوم الزمن
معوّد هالقلب عَ الصدعات والمِحَن
كلّ يوم متل الفرض فيه هزّة بدن
وكذبة جديدة وحبل الكذب جرّار.
بكذب عَ أهل بيتي بشأن وضعنا
لمّا يسألوا مين بِ هالحالة وضعنا
شكلنا من الآخر تشتتنا و ضعنا
وصرنا كوام قش بوجه إعصار.
راحة البال صارت اِلنا حلم
أحلام عَ السكت سارقها العتم
هونيك تخمين في آخر نجم
يمكن بشي يوم ياخدنا مشوار.
.. محمد عزو حرفوش..
ليست هناك تعليقات:
إرسال تعليق